Ehrenfester Frohsinnvater Stefan der 1. mit Frohsinnmutter Priska

Ehrenfeste ehemalige Frohsinnpaare

Geschätzte Ehrenmitglieder mit Frauen

Geschätzter Präsident Niklaus mit Christine

Ehrenfeste Zunftmeister der befreundeten Zünfte mit Delegationen

Geschätzte Gäste

 

I dem Jahr, das isch hiä wohl allnä klar

gits ä Frohsinnvater, wo mit Huut und Haar

sich die Muisig hed verschribä

und das isch im Fall von Stefan Number One überhaupt nid übertribä

 

„Musik ist Trumpf“ heisst ja seys Motto

und nicht eppä Gmiäs, Fleisch odär gar Risotto

seys gliäbtä Instrumänt isch‘s Saxophon

det hed är Pfuus wie d’Nicola Spirig bim Triathlon

 

Im Musigverein Hergiswil engagiert är sich ungemein

seyni ganzi Famili spilt det as Instrumänt seibärli und fein

d‘Frohsinnmueter Priska blast ai s’Saxophon i derä Truppä

und ai iri Chind spaizid ihrne Eltere in dem Orchester nid id Suppä

im Gägäteil: sey Sohn Cedric isch ä Virtuos uf dä Posune

und s‘Klarinettspiel vo dä Tochter Daphne verbreiti rundum gueti Lunä

 

Frohsinnvater und Frohsinnmueter verbringid ai gäre Zeyt i dr Natur

am Stefan isch also verlorä gangä ä güetä, tatchräftige Buur

jetzt isch är halt ufäm Riädbodä Hüttäwart

und luegt det guet zu sinä Gäscht, ufmerksam und üsserscht smart

Au im schnellä Laufä händ sich Frohsinnvater und Frohsinnmueter verschribä

si sind am New York-Marathon 2012 nur wägem Wirbelsturm Sandy uf dä Strecki blibä

2013 aber sind sie de äs fantastischs Rennä gloffä

und hend als Paar d’Ziellinie überschritte, das laht eys fir d’Olympiade hoffä

belohnt hend sie sich, das hani no vo Insider gheerä sägä

Mitämänä währschaftä Schnupf – da heigi ai’s Dopingreglemänt neyd degägä.

 

Im Bruefsläbä isch eysä Frohsinnvater Chef vomänä bestens bekannte Druckunternähme

är seygi sehr kompetänt, träti Kunde und Agstellte sehr mänschlich entgäge

vodä Pikä uf hed är sis Metier bi sim Vater Walter erlernt

keys Wundär, dass mä vo sinärä Buidä i dä ganze Zentralschweyz schwärmt

 

Ehräwärte Stefan de Erschti, es isch ja hinlänglich bekannt

idä 5. Jahreszyt herrscht de Frohsinnvater ubr eyses Nidwaldner Land

miär Regierigsrät hend währed de Fasnacht neyme z’sägä

wenn miär jetzt au no umesecklid, de wär das bimeich vergäbä

drum uberlend miär Diär gäre d‘Gschick ubr eyse Kanton

d‘Details chönid miär scho no besprächä – nur eis nid: d’Uberweysig vo eysäm Lohn!

Dä Frohsinnvater sell jetzt ruhig mal eysi Problemdossier leesä

D‘Regierig g‘findsch drum ade Fasnacht – oder bim gmiätlichä Uisdeesä

 

Zu deynä Jobs, lass mich Dich churz instruiärä

also mit äm Flugplatz – da gits vermuätlich neyd z’plagiärä

aber s‘Dossier isch uf guätäm Wäg und lid nimmä ufäm Schraagä

das chunt jetzt scho guäd und schlaht diär vermuätlich ai nid uf dä Maagä

s’neuä Betriebskonzept darfsch aber gärä konkretisiärä

nid z‘gross, nid z‘chlei – suscht wärdid de glei mals alli zämä reklamiärä

aber i dä Politik, säb weiss mä, chasch unmeglich allnä g‘fallä

Stefan, pass eifach uf – und produzier fir eys bis am Äschermittwoch kei Millione-Fallä!

 

Au um dä Doppelspurusbau vo dä zb in Hergiswil darfsch dich gärä kimmärä

luäg eifach, dass Du s’Problem nid no meh duäsch verschlimmärä

ich bi froh, nimmt das än Ur-Hergiswiler resolut ad Hand

so hed mer eifach die beschtä Charte im Nidwaldner-Land

settsch als Lösig än schönä, lange Tunnel favorisiärä

wirsch de vermuätlich au weniger müässä mit äm Zbärg Remo lamentiärä

 

Gschätzti Gescht, a dr Fasnacht tiend miär Traditionä pflegä

drum erteilt eych d’Nidwaldner Regiärig jetzt offiziell ihre Sägä

Liäbä Frohsinnvater, liäbi Frohsinnmueter, liebi Leyt

Ich winschä eych allnä ä wundärbari Fasnachtszeyt!